FÁLAME SEMPRE!

O Concello de Cangas a través da Concellaría de Servizos Sociais, Igualdade e Sanidade en

colaboración coa Federación Española de Municipios e Provincias pon en marcha a campaña

Fálame sempre! sobre a prevención e o consumo responsable nos bares. Nesta ocasión a

campaña abórdase dende o plano emocional. O manexo emocional está presente en todas as

facetas das nosas vidas. O xeito co que nos relacionamos e nos vinculamos tanto con nós como

co resto da xente está dirixido por mecanismos emocionais.

Todas as persoas temos unha tendencia natural á proximidade e ao contacto que pode darse en

moitos ambientes: no privado, dentro da familia e no público en diferentes espazos de ocio como

son os bares. Os bares son centros de reunión social, espazos de encontro, espazos de consumo

de alcol pero tamén de consumo de conversa e interacción. Este é o principal foco da nosa

campaña, fortalecer o bar como espazo de xuntanzas e de consumo de conversas.

Fálame sempre! é mais que unha frase curta. É unha chamada á amizade, a coidar uns dos

outros. É darlle valor á conversa, á escoita, a fomentar a unión e a irmandade entre as persoas. A

campaña ten como obxectivo principal traballar cos hostaleiros e hostaleiras de Cangas en torno

á idea de poñer en valor á dimensión emocional dos seus negocios. Ao mesmo tempo,

contactaremos coa súa clientela para retratar e recoller a súa historia como grupo.

Enxalzar estes grupos Fálame sempre!, poñendo a atención no bar como espazo emocional de

encontro positivo onde o importante é a conversa e os coidados que os grupos teñen uns cos

outros, non o que se bebe. A campaña ten varias accións:

– Elaboración e difusión dun vídeo promocional da campaña onde actores e actrices de Cangas

desenvolven un momento Fálame sempre! nun bar e convidan a hostaleiros e hostaleiras e á

cidadanía a atoparse na conversa.

– Encontros de coordinación e presentación cos hostaleiros para a súa participación activa na

campaña.

– Interacción cos bares adscritos á campaña onde se recolleran en retrato ou audiovisual os

grupos FÁLAME SEMPRE, persoas que se están a divertir e poñen en valor o bar como espazo

de encontro e que se xuntan con outras persoas para compartir a súa emoción e a súa historia de

grupo.

Gabinete de comunicación

Concello de Cangas.